កំពង់ស្ពឺ៖ ចាប់ពីខែសីហា ឆ្នាំ២០២៣ ស្ត្រីដែលប្រសូតបានកូនភ្លោះនឹងទទួលបានប្រាក់ឧបត្ថម្ភជំនួយសង្គមទៅតាមចំនួនកូន ដែលនេះគឺជាការសម្រេចរបស់នាយករដ្ឋមន្ត្រី សម្ដេចតេជោ ហ៊ុន សែន នៅព្រឹកថ្ងៃទី១៧ ខែមិថុនា ឆ្នាំ២០២៣ ក្នុងជំនួបរវាងសម្ដេចជាមួយនឹងកម្មករជិត ២ម៉ឺននាក់ក្នុងខេត្តកំពង់ស្ពឺ។
សម្ដេចតេជោបានលើកឡើងថា សម្ដេចទើបតែដឹងថា ប្រាក់ឧបត្ថម្ភដល់គ្រួសារដែលមានកូនភ្លោះរហូតដល់កូនអាយុ ២ឆ្នាំ គឺទទួលបានដូចអ្នកដែលប្រសូតបានកូនមួយដែរ ដែលសម្ដេចបានបញ្ជាដល់រដ្ឋមន្ត្រីសង្គមកិច្ចឲ្យមានការបន្ថែមការឧបត្ថម្ភទៅលើកូនភ្លោះតាមចំនួនកូន។
សម្ដេចថ្លែងថា៖ «នាយករដ្ឋមន្ត្រីសម្រេចឲ្យមានការអនុវត្តសម្រាប់ស្ត្រីដែលមានផ្ទៃពោះ នឹងទទួលបានការឧបត្តមរហូតដល់កូនអាយុ ២ឆ្នាំ តាមចំនួនកូន។ និយាយរួមគឺទទួលបានលើសពីរអ្នកដែលមានកូនមួយ»៕
